Am 2. April 1982 isch d Frau Fasnacht im Reschtaurant Jägerhalle zem
wiederhohlte Mol entbundè worde und d Basler Musketiere hänn s Liecht vo
dr Wält erbliggt. Geburtshälfer sin 10 Fasnächtler
gsi, mit dr Motivation ebbis Nais us z broobierè und um z setze und
dodermit d Fasnachtsszene z belääbe. Nid Guggemuusig, sondern -
"Fägi-Musig" - hett dr Usdrugg fyr unsere Stil miesse si. E
aggtiv Verainslääbe s ganz Joor duure mit maximal 18 Mitglieder z
feerderè, d Fasnacht z gniesse wie s ys grad gfallt und musikalisch
unseri Meeglikaite us z loote und naii Ideè zem klinge z
bringe, sin d Grundgedangge vo dr Fägi-Musig.
